Asmara,(insidesomalia.org)- Shiikh Xasan Daahir Aweys oo isagoo ku suga magaalada Asmar ee dalka Eritrea qadka taleefoonka ugu waramayay idaacadaha Muqdisho ayaa waxaa uu uga digay xoogaga Muqaawamada in aan ku sirmin heshiikii Dalka Jabuuti, waxaana uu ku tilmaamay in lagu doonayo heshiikaasi in lagu hagar daaciyo hanaanka ay ku socdaan xoogaga  Muqaawamada ee ka jira gudaha Dalka Soomaaliya.

Shiikha ayaa waxaa uu shacabka Soomaaliyeed ugu baaqay in ay ku sii adkaadaan dagaalada ay kula jiraan wax uu ugu yeeray gumeeysiga dalka ku soo duulay.

Sidoo kale Shiikh Xasan Daahir Aweys ayaa waxaa uu si aad ah uu u canbaareeyay Ergayga Gaarka ah ee Qaramada Midoobey u qaabilsan arimha Soomaaliya Ahmed Walad Abdala waxaana uu ku eedeeyay in uu xirir hoose lal leeyahay Dowladda Itoobiya isla markaana uu doonayo in uu kala jabiyo oo uu kala qeeybiyo awooda muqaawamada ee ka jirta dalka Soomaaliya.

“Waa la yaqaan Ninkaasi waxaa uu xirir toos ah la leeyahay dowlada Itoobiya marka waxaan xoogaga Mujaahidiinta uga digayaa in aan ku kadsoomin howlaha uu wado iyo heshiika dalka Jabuut” ayuu yiri Shiikh Xasan Daahir Aweys.

Xasan Daahir Aweys oo garabka isbeheeysiga dib u xoreeynta ee ku sugan magaalada Asmar ay u aqoonsadeen in uu hogaamiyo ayaa si weyn u dhaleeceeyay hadalka ka soo yeeray sheikh Shariif Shiikh Axmed oo ahaa eedeeyn uu u jeediyay dowlada Eritrea oo uu ku sheegay in ay kala dhantaaleeyso shacbka Soomaaliya isla markaana ay dooneeyso in dhiiga ummada Soomaaliyeed uu sii daato.

Shiikha ayaa waxaa uu hadalkaasi ku tilmaamay in uu yahay meel ka dhac loo geeysanayo dadaaladii ay u gashay dowlada Eritrea howlaha dib u xoreynta, waxaana uu sheegay in taasi ay cadeeyneeso in ummada Soomaaliya ay yihiin kuwo abaal dhacyaal ah sida looga bartay.

Waxaana uu sidoo kale sheikha uu ku tilmaamay Dowlada Eritrea in ay tahay mid wax weyn u gashay Isbeheeysiga Dib u xoreeynta Dalka Soomaaliya isla markaan ay gacan u fidisay xil ay aduunka oo dhan la dagaalameen isla markaana ay irdaha ka xirteen sida uu sheegay.

Hadalka sheikh Xasan Daahir Aweys ayaa waxaa uu ku soo beegmayaa xili ay soconayaa dadaalo lagu doonayo In lagu meel mariyo heshiikii dalka Jabuuti waloow uusan jirin hal qodob oo filci ahaan u dhaqan galay.